التونسي والفايسبوك : فردة و لقات أختّها

ما صدّق ربّي لقى بلاصة في الانترنت بوبلاش، يقطّع و يريّش فيها، يتفرّج في تصاور، فيديوات و أخبار ... التونسي والفايسبوك ولاّت حكايتهم حكاية، تي حتى من التاريخ باش يحكي عليهم .

 

ماناش أكبر دولة كونكتي، أما باكثر من 2.7 مليون تونسي عملنا القّهر !

نذكركم و انما الذكرى تنفع المؤمّنين ، بين 17 ديسمبر و 14 جانفي الدّنيا قامت و قعدت على الفايسبوك ، اللّي  ماعندوش كونت عمل موش باش يشاتي برك، أما باش يشوف الأخبار بلاش مقص، من المنتج إلى المستهلك طول على خاطر وقتها كلنا أولاد وبنات ، رجال و نساء ، بيت بيت زنقة زنقة  ولينا كي خميس بوبطان في قلب الحدث !

14 جانفي جاء، زابا قطع،  و التونسي ولا حر ! وعندو حرية التعبير زادا وزيد عليها مفمّاش عمّار 404 ،وكيما يقولها "غيب يا قطّوس إلعب يا فار" أما موش جرذان !! تي حاصيلو الفايسبوك ولا كقهوة الحومة اللي هذا يعّبر و ينبّر على كيفو ، و التّنبير عند التوانسة برشة أنواع ، و مواكب للعصر زادة ، لا خالاّو نكت، لا فيديوات و لا تصاور و الفوتوشوب خدّام ! 

      الو...مبارك انا فهمتك اي نعم فهمتك!يظهر فيك باش تخلط...براس بوك جيب في ايدك طرف صبيغة...حزني والمي كبيران...زربوني يا اخي رصاتلي نكبس بالحنّة لهنا...

 و موش كان زابا و ليلي   اللي نبّروا عليهم ، وصل الطش لمبارك وبعدوا القذافي إلي ولّى قردفي  ، وأخيراً  وليس آخراً الزحف المقدّس للتّنبير وصل لأباما ، والراجل ولا تكركيرة في  الباج متاعو و حتى من الشعب الأمريكي ولا يطالب بإسقاط النظام !

"يقول القذافي : ايه الشعب لولا الكهرباء لجلسنا نشاهد التلفاز في الظلام"

التونسي فنّان مش كان في التّنبير بارك، كان باش نحكيو على التبزنيس تبركالله الكونت المزمّر تلقى فيه 100 طفلة هذا إذا كان مش أكثر ،  و ميعرفهمش، برك عجبتو في التصويرة، خلي عاد منحكيووش على البنات إلي متحلالهم التصاور كان في التواليت و الله يرحموا الحاج نبّار في كلمة :  "يا  فايسبوك يا حنين ... رديت العفش مزيانين"...  و كان باش نحكيو على التشلويش والبيع والشراء ، ما أكثرهم الباجات وفي الدومنات الكل من الفريب و اللبّسة ،الالكترونيك ، تي حتى سوق منصف باي متع الحيوانات موجود.

 Sou9 Moncef Bey ***vente & achat animaux***

الحاصيلو منطوّلش عليكم ، الفايسبوك للتونسي نعمة، إستغلّها كما يلزم باش عبّر على رايو السياسي و عاونو برشة باش تخلّص من زابا و زبانيته، و خلاّ برشة بلدان عربية و حتى أجنبية تبعوا أما زدا الفايسبوك عند برشة وخيّان أخرين نقمّة، كيما وصلوا عرّسوا بيه، فما شكون طلّق من جرتو.