يا تونس ... شنيّة آخرتك ؟

 

توا محسوب 3 شهور ملّي عملنا الإنتخابات ، إنتخابات المجلس التأسيسي ، و الحكومة تشكّلت كان ما روحنا طلعت ؛ الرئيس المؤقّت شد بلاصتو لامحالة هاو يدادي من بلاصة لبلاصة و البرنوس فوق كتفوا ... !

ودعنا 2011 و استقبلنا الكّل 2012 ، انشالله مبروك علينا الكل و خاصة على تونسنا الغالية إلي أحوالها   متحسّنتش، تي متعجبش من اصلو لا إجتماعياً و لا إقتصادياً ! خلّي عاد هذاك حدث و لا حرج !! هاو كل يوم تسمع غريبة و جماعة تطلعلك بطلعة جديدة ، و تونس  بلادنا قعدت كالكورة بين الذكورة !

كل مرّة نسمعوا بإعتصام جديد في بلاصة و كل مرّة حكاية مفقودة فالبلاد ، هاو مفمّاش حليب ، مفمّاش غاز ... يا عباد راو اقتصادنا في الزيرو ، شركات سكريت ، مستثمرين اجانب هربوا ، بعد اللّي أي هذا يحك راسو يعتصم و يسكّر و يوقف بلاد كاملة ! قال شنوا حر و نطالب بحقّي !  و حتى الحاكم موش هوني هاو ولا خايف على روحو و خلالكم الحرية تجري و تبرطع وحدها في  الشارع ! يا بو قلب معمل يازاكي سكّروه ، الراجل هججوه مل بلاد ، تسببولنا في كارثة بقلّة الوعي و الجهل ! 2500 خدام في ليلة و نهار صبحوا بطّالة ! ناقصة هي ؟! أما هاو قلّك عاد انشالله باش يرجع بعد اللّي لحلحو به و شوف عاد  كيفاه باش يرجع !

توا هاذي هي الوطنية اللي يحكيو عليها ؟ فيعوض كل واحد يشد بلاصتو و يصلّي عالنبي و يخدم على روحو فماشي ما نعديو هل العام على خير و نتعونوا حجيرة  حجيرة نبنيو بلادنا و نصلحو اللي خربوه هاك  الفساد  الكلاب ، اللي باز راهم شايخين عاد توا وميجكش عجب راهم يضحكوا علينا وعلى حوالنا ! تي نحمدوا ربي ما صارش فينا كيما صاير في برشة  بلدان أخرى. راو مشاكل بلادنا كي شعر الراس ، لازم وقت باش المشاكل الكل تتحل و برشة صبر ، صحيح للصبر حدود أما حتى كان معادش فيها و نويت تعتصم كي قدر ربّي،  ما تعطّلش مصالح غيرك و توقفهم على خدمهم  ، و تكلّف الدولة مليارات اللي كانت تنجم توظّفهم بش تخدّم هاكل البطالة إلي يستنو بش يكلوا الخبز كيفك و ممكن حتى بالفلوس هذيك كانت تنجم تحقق مطلبك !

يزونا بالله من الأنانية و صحّت الراس راهي ماعندها وين توصل كان لقطع الرقبة ! وكان في 2011 سلّكناها و الحمد لله بشوية الفلوس الفاضلة  متع 2009 و2010 ، مالا 2012 كيفاش ؟