تونس : هي تشخر ... و زيدها توك توك

أي نعم ، توك توك اللي نشوفوهم في الأفلام الهندية قريبا في تونس ...

قالك يا سيدي هذا حل من الحلول العاجلة ألي طلعت بها حكومتنا البهية ، لمساندة اقتصادنا التاعب في محنتو و التعجيل في إنتحارو !! ها الحال فعلوه بالوقت و بداو في الإجراءات اللازمة .

باش يجيبولنا 21 ألف توك توك ، توك توك يحك في توك توك ، هاذم يا بابا كادو من الدولة للعاطلين عن العمل بعد مشاركتهم الفعالة في جني صابة الزيتون ، و زيد فرصة لتوفير ما يقارب 30 ألف موطن شغل ، هاوكا واحد يسوق و واحد يدز ... أما ردوا بالكم ،  هاذم راو متع هزان سلعة كهاو مش عباد ، باش منعملوش مشاكل مع جماعة التكسيات و غيروا ...

هاوكا زابا عمللكم قناطر و كبرلكم في الكياسات ولو يهز زوز شبيك ، متفرهدين مفماش أكسدونات ، و عامكم الجبالي جابلكم هل وسيلة السحرية باش يسهل الحركية التسويقية للنهضة في فترة الإنتخابات ... قالوا 30 ألف موطن شغل !! و هو فما جبالي يصطاد لربي !!؟

تي حاصيلو ،  مكاسب الثورة اللي حلمنا بيهم طاروا كما طاروا الجميعة لدبي و كندا ، ماشي في بالنا باش نتطورو  و نوليو كما تركيا ؛ حرية، ديمقراطية و بلا بلا بلا ... أما باش يشيخوا فيها كان محبي الأفلام الهندية ، هوكا على قريب باش توليو تعيشوا في قندهار !